Sunday, October 10, 2010

لا تعليييق يوم 6 أكتوبر
******************

موقفين حصلوا فى وقت واحد
صدمونى وفرحونى

اول موقف فى مكروباس بيعدى قدام دار الاشغال العسكريه
شاب فى الثلاتين شاف منظر الاحتفالات على الكورنيش
مظلات بقا وطيارات هليكوبتر
وشقلاباظات وحركات
قال حسبى الله ونعم الوكيل على دى بلد بنت*****
بعملوا عرض هليكوبترات واللى واقف يتفرج عليم غلابه بجلابيات وحافيين ومش لاقيين ياكلوا
مش يتقوا الله ف الشعب
اعترض راجل كبير ف السن
وقال انت مبتقدرش
الحرب وقيمتها
والتعب اللى تعبناه

رد عليه وقاله الولد
قيمه ايه يا ابو قيمه ما اليهود فى بلدنا اكتر م الرز
والحاجه الوحيده اللى خدناها

كانت ابن ديك الكلب بتاع الضربه الجويه اللى على قلبنا من يوم ما اتولدت

يا استاذه مش انتى متعلمه وبتدخلى نت
قلتله اه
قالى دورى على بيان التغيير وامضى عليه

كل اللى راكبين منطقوووووووووش

***********************************

الموقف التانى
برضو وانا ف الميكروباس

بسبب مواكب البهوات الطريق واقف
ف المكروباس واقف وفاتحين الباب

اطفال بتلعب كبيرهم عنده 12 سنه وبتتفرج على المظلات اللى ف الجو ورافعه صور
شد انتباهى ف الاول لحديثهم
معرفتهم بالرؤساء
الولد بيقول لصاحبه
ولاه ولاه بص
صوره محمد نجيب ف الاول اهىى

قاله اه اه واللى وراه دا مش جمال عبد الناصر

فى واحد جاى بالبراشوت اهو فى صوره السادات يا لاة

قاله والى جنبه حسنى مبارك

ف بص صاحبهم وقالهم امال صوره مين اللى وراه الخامس دا

قالوا ممكن يكون ابن امه اللى جاى بعد ابوة
والعيال كلها ضحكت

*************************
لا تعليييق

Thursday, August 12, 2010

عندما اوقظنى شافيز للمرة الثالثة
************************
بعد يوم شاق من العمل
اعانى من قله النوم
جوع
متعطشه لبعض الكافيين
فى ميكروباس فى طريقى ال المنزل
الهواء يصدم وجهى فيزيد رغبتى فى النوم
احاول جاهدة لابقى عينى مفتوحه
اسمع اغنيه
فتيدا كلماتها فى الاندماج
وابدا فى الاستستلالام
الاستسلا الاست...
ال ا ا ا ا ا ا
شااااااااااااافيييييييييييييييييييييز
اسمعها فى اعماااااااااااااااااااق النوم
فاستيقظ فى ذعر
فالاقى كل العيوين تنظر لى فى استغراب
يبدو انى انا اللى قلتها بصوت عالى
ممكن يا عم شافيز تسيبنا ننام بقا

Friday, July 16, 2010

قالى صديق مقرب :
بستغربك اوى لما بتسوشياليزى مع الناس وتتناقشى معاهم ف المترو ف التاكسى ف اى حته
...ابتسمت وقولتله اصلى بحب اتعامل مع الناس اوى
وبصيت للازاز
"
انكسفت اقولو انهم الناس الوحيده اللى بتكلم معاهم فى يومى كله
.............................
فقدت الاحساس بالوقت
فقدت والمكان
كرهت اوضتى ودولابى
معرفش العيله والصحاب
صوت:
شششششششششششششش

حركة
توؤ

يبقى برضو غلطانة

Thursday, July 08, 2010

بأمر واقع:
أرقصى
بأمر واقع :
اتشقلبى
بأمر واقع :
اتنططى

بنتين كانوا بيلعبوا فى المترو عندهم 8 سنين استغربت اللى بيتقال دا جدا وسألتها هى ليه بتأمرك كده وانتى ليه بتنفذى
قالتلى "الى كانت بتأمر"
دى لعبه
سألتها طيب ما تغيروا الادوار هى تأمرك وانتى تنفذى
رفضت تماما والتانية استغربت جدا كأنه امر غيروارد
واحده اصبحت بتأمر والتانية اصحبت خاضعة لها
.....
هو القهر بنتولد بيه ولا بنتعلمه

يا ترى البنت دى لما تكبر واهلها يقهروها
هتعترض
ولما تتجوز

يا ترى كمواطنه فى بلد القهر سايقها
هتعترض

بأمر واقع
صوتى
بأمر واقع
اسكتى
بأمر واقع
موتى م الجوع

Friday, June 11, 2010


stoning of soraya what about Islam??


last night i saw a movie called The Stoning of Soraya i was Shocked i have never heard about it the movie is based on a true story( adapted from French-Iranian journalist Freidoune Sahebjam's book)
  • its talking about woman called Zahra lived in small Village in Iran her husband was cruel wanted to get divorce from her and marry a 14 years old girl she refused because she and her 2 daughters will starve so he used the Islam Sharia and conspired with a corrupt mullah in the village to get rid of her he accused her with adultery with no prove and persuades the rest of the village to take part in her execution then they stoned her to death
  • i cried for hours when i saw the stoning scene that made me think about it
  • _ in Islam there is a very important condition : 4 men has to witness the adultery and that so difficult so its impossible to prove it which mean its not important prove it to punishment but its important to let the Muslims knows that adultery is a big sin !!!!
  • this story happen every day in Iran and Afghanistan 100 of women get killed every day in the name of Islam all of that because of a corrupt mullah which contradicted with the Islamic rules this kind of men who defame the Islam all around the world and instead of fighting this kind of men we fight Islam and Muslims all over how could they used Islam to make the Muslims look murderers and terrorists our women wearing black (nikab) why i didn't see any thing in the Koran ordered them to wear black??
_ saying that non Muslims is kofar, even Muslims (who is not following the steps ) all Religions called women to wear decent clothes but these people are not acting according to Islam but they are following their greediness and lusts and also corrupted governments set the hands of fundamental restricted Islamic groups in the society to put the people into the choice like Taliban in Afghanistan and the salfeen in Egypt link to reed the book:

Sunday, May 23, 2010



كل مره بسمع فيها التراك دا بتاع بينك فلويد
بحس انى قاعده فى اوضة ضلمة وفيها ضوء ازرق خفيف
وهوا جااامد اوى وسقعانه
وساعات بيجى لحظه دفا كده وبحس بشىء مألوف ف المكان
بس برضو بيفضل احساس السقعه فى اوضة غريبة وضلمه
بيفكرنى دايما بالحلم اللى مش عارف انا حلمته مره ولا كذا مره
واقفة فى غابة الوانها حلوة اوى
ولابسة فستان حلو
وفجاءه الصوره تبقى ابيض واسود
ووحشه
حتى الصوره الحلوة ممكن فى لحظه تتقلب
...................
انا بقيت بحس الاحساس دا
فى كل لحظه فى حياتى
اصبح شبة دائم
.........
يا ترى فى حد هناك
من الاساس
ولا دا كله منى

Friday, May 21, 2010

كنت لسه بتفرج على فيلم احكى يا شهرزاد ووقفت عند جملة مصر اتحجبت

هى المشكلة فى جيلنا دا :
انا لو قلت راى فى الحجاب هيكون مالوش دعوة بالناحية الدينية نهائى انا هتكلم عن المظهرر العام
الدين موجود فى مصر طول عمره والناس قبل كده فى زمن جدك وجدى مكانوش كده

انا عايشة فى محافظه مش ف القاهره ف الناس معروف انهم بيكونوا اكتر تحفظ
......................................................
لما كنت فى ثانوى ولقيت صحابى كلهم لبسوا الحجاب بعد ما كان المدرسة 90 فى الميه منهم غير محجبات فجاءه بقا 70 فى الميه منهم
محجبات
انا شخصيا عملت زيهم فتره وبعدين عدت تفكير فيها
حسيت ان الحجاب موضه اكتر من انه دين
مع الاستثناءات طبعا فى بنات محجبين فعلا ودينا
بس انا بتكلم على الاغلبية اللى بتقابلهم فى الشارع وفى الكلية وفى كل مكان لا يعقل ان البنت تلبس حجاب على راسها وهى لابسة جينز محزق وبدى وبتشرب سجاير ولا قاعدة مع ولاد زى اللى بتشوفوهم على الكورنيش
بس ساعتها افتكرت لما سالت صاحبتى هى محجبة لية ؟؟
ضحكتنى اوى جملة سمعتها من بنت صاحبتى لابسه جينز يعلم الله وحده دخل فيها ازاى دا وبدى ميفرقش عن الجينز بكتير لما حاولت اسالها على حجابها قالتلى اه صح انتى عندك حق انا محتشمة مش محجبة
انا فعلا فطست ضحك لانى لابسه جينز اوسع من بتاعها تسع مرات وقميص لطيف فاتغربت انها هى كده اللى محتشمة
زفى نفس الوقت لما نزلنا الشارع كان بيتقالها عبارات فى منتهى القذراة من المعاكسة وانا مبسمعش فعلا كومنت
رغم ان من المفترض لو الدنيا ماشية كده انى انا اللى اسمع كلام مش لطيف بحجه انى متبرجة ومش محجبه
بس لما بروح كليتى لاقيت ان مفيش غير عدد قليل من البنات اللى مش محجبات دا غير اللى فى ديانة تانيه
وبننتقد على دا من البنات واصبح فرض انك مسلمة يبقى لازم تلببسى ايشارب مش مهم لابساه ليه ولا شكل لبسك ايه المهم انك لازم تلبيسه

ليه؟؟
مدام بقا الموضوغ مالوش دعوه بالدين يبقى الموضوع ليه دعوه بايه نفسى افهم

طب مدام احنا كده امال اللى بعدينا عاملين ازاى :
________________
على النقيض تماما
نازله اجيب طلبات للبيت بدرى الصبح فى معاد دخول مدرسة اعدادى جنب البيت
لقيت البنات اللى \داخلين شكلهم صغير اوى افترض انهم فى اولى اعدادى لابسين رصاصى بنطلون وعليه بلوزه طويله وايشارب ابيض كبير
وبيبصولى باحتقار وتعجب كأنى كائن من المشترى وبركب المكوك قدامهم
انا ساعتها اتوترت اوى قولت هو انا نازله مثلا حافية ولا فى ايه
ايه غريب فيا اوى كده
وبعدين هما شكلهم عامل كده ليه

ساعتها جه فى دماغى اوى شكل البنات اللى فى سنهم فى فيلم اسامه اللى بيتكلم عن طالبان
واخيرا نطقت واحده (وكانت بتتلقح بالكلام على العبد لله )
قالت استغفر الله العظيم
؟؟؟
هتتحاسبى على حجابك
اتصدمت فعلا
واتصدمت اكتر لما لقيت ان كمان فى بنات فى سن الابتدائى بدأوا يتحجبوا ويلبسوا طويل معدشحتى شكلهم اطفال زى ما كنت بشوفهم
هى طيب ليه مقالتليش مثلا هتتحاسبى على صلاتك ولا دينك
بس ذكرت الحجاب
اتاكدت فعلا ان الموضوع مالوش دعوة بالددين تماما
ربنا مقالش اتحجبوا وبعدين صلوا وصوموا


واخيرا نازله لاول مره بلد جنينا اصغر
لقيت اتشال خلاص البوستر اياه اللى كلنا بننشوفو الحجاب قبل الحساب
وبقا نقابك يا مسلمة قبل مماتك

انا فعلا بقيت محتارة جداااااااااااا
احنا بنرجع لورا
ولا بنطلع لقدام عن طريق ورا
فى ازمة هوية جامده اوى عند الناس
الدين عامل ازمة ليه
من مصلحة مين الحال اللى وصل اليه الناس ومسئول عن تشكيل تفكيرهم بالشكل دا
انا كنت فى يوم فى نفس المدرسة نفس المبنى ونفس الشارع ومكنتش محجبة وكنت بلبس عادى وبخرج مكانتش الدنيا كده
ايه اللى حصل فى العشر سنين اللى فاتوا


هى مصر شكلها هيبقى عامل ازاى بعد كدة

انا محبطة لانى مش لاقيا مكانى
انا محبطة لانى مش لاقيا صحابى
انا محبطة لانى مش لاقيا اهلى
انا محبطة لانى مش لاقيا بلدى
انا محبطة لانى مش لاقيا لغتى
انا محبطة لانى لقيت فراغ

Newer Posts Older Posts