Sunday, November 10, 2013

انا فاكرا اننا لمنا اهالينا ايام مبارك على الوضع اللى وصلتله البلد
وعدت سنين
وثورة ثورة

جه المجلس العسكرى:
يسقط يسقط حكم العسكر

جه مرسى:
يسقط يسقط حكم المرشد


عسكر تانى!!!!؟
يسقط يسقط شششششششششششش بس يا بتاع الاخوان وتسلم الايادى ترارارارارااااة



اقول لبنتى ايه
طب والنبى احكيلها ايه بقا  . طب احكيلها ازاى
عفوا صوفية انتى لسه صغيرة ارجوكى لما تكبرى متحرجينيش وتطلبى منى احكيلك حصل ايه فى مصر 

Posted by Nadine Abu Shady at 12:53 PM 0 comments

يوم الجمعة تانى

اخر بوست كتبتة كان 29 اكتوبر 2011 وكنت بنتقد فيه موقف العسكر والمحاكمات والدهس بالدبابات


المضحك فى الموضوع ان عدى سنتين وجت فى دماغى المدونة كده قلت افتح اكتب لقيت البوست موجود
ملقتش حاجه اكتبها لاننا رجعنا تانى لنفس الموال ولسه هيتصاعد


الموقف بيفكرنى بفيلم حماده هلال اللى قعد يعيد فى يوم الجمعة لما جاله ارتجاج فى المخ


ولازال شعارى يا مأمن العسكر يا مأمن النمل على السكر

Posted by Nadine Abu Shady at 12:46 PM 0 comments

Friday, January 25, 2013

ادى حيطة
ادى اتنين
ادى تلاته
ادى اربعه

واخيرا السقف
..........................

Posted by Nadine Abu Shady at 11:39 PM 0 comments

Saturday, October 29, 2011

السنة اللى احنا نفخنا فيها مبارك نفخنا احنا المجلس العسكرى
الثورة المصرية ام الثورات
بعد ما مبارك اتنحى ونزلنا الشوارع ورقصنا ولاول مره نحب العلم بتاعنا فشر ماتش مصر والهولولولو
لكنا كنا ساذجين
لم نكن نعلم عزيزى القارىء اننا و
قعنا فى ضوحضيرة
ايوة
ضوحضيره

بسم الله ما شاء الله
خمسه وخميسه فىعين الحاسد
بدلنا لطخ بمجلس بحاله
وحرية دى يا سيدنا تبقى خالتك
محاكمات عسكرية ...شييييييييييييل
تعذيب فى اقسام الشرطة... اللللللبببببببببببس
قبل الثورة كلنا كنا خالد سعيد بعد الثوره بقينا كلنا مايكل مسعد صاحبنا اللى دهسته الدبابة وبقينا عصام على عطا اللى اتعذب ف قسم الشرطة

تفتكروا بكره الدور على مين

ادى الشعب وادى ثورته
والمجلس له ايه عند الشعب غير تلات حاجات؟؟؟؟؟؟؟؟؟؟؟؟









Posted by Nadine Abu Shady at 9:12 AM 0 comments

Sunday, October 09, 2011


That's how the military running the country
Micheal Mousaad was killed by the military tanks
see whats the Egyptian militry is doing with the Egyptian youth
Micheal and Vivian were engaged years ago and all of us were waiting them wedding

Thanks our butchers council for make it impossible

REST IN PEACE MICHEAL

Posted by Nadine Abu Shady at 2:12 PM 0 comments

Sunday, May 22, 2011

***********
احنا اتنصب علينا يا رجاله
بين قوسين ايوة يا مطواه تبقى فى جيبى وانضرب


---------
اتنصيب علينا يا جدعان من يوم 11 فبراير
عندما "تخلى " على حد قولة حسنى مبارك
هو اتخلى من هنا وانا اضحك على من هنا


تحية للشهداء
وجيشنا يا جيشن يا احلى جيش


وسقط الدستور



وانااضحك عليا يا جدعان واتثبت وعيب كده


انضحك عليا لما حول المتحف المصرى لسلخانه تعذيب


انضحك عليا لما نصبلنا محاكمات عسكريه باطلة


انضحك عليا لما قمع رأى شاب وحبسه علشان مقال


اده


فين الثوره


فين عرق الناس


فين الناس اللى ماتت علشان احنا نعيش


استبدلنا القمع بالقمع


استبدلنا الحاكم العسكرى بمجلس عسكرى


استبدلنا المختل العقلى والماس الكهربى بالفلول والثوره المضاده والسلفيين


بس المرى دى ميرى اوعى وشك يعنى


لا من حقك تنطق ولا اعلام ينشر


----


زمان واحنا فى المدرسه كانوا بيطلبوا مننا نرسم مشهد لحرب اكتوبر كنت بفرح اوى واقعد افتكس فى رسمى وارسم شاهد قبر جندى شجاع وارسم دبابه بخيالى مكنتش عمرى شفتها الا ف التلفزيون واقعد افنن فى تشيكلات الزيتى اللى فى زى الجندى وسلاحة بالنسبه لى كان عظيم


كلمة جيش مصرى مخيلتى كانت بترجمها بفيلم حرب الكواكب والمقاتلين الشجعان


متخيلتش عمرى انى هلاقى الدبابه واقفه فى وشى وبتمنعنى


متخيلتش ان الزى اللى بحبه وبحترمه يقبض علي ويهينى


متخيلتش السلاح العظيم ينضرب عليا


انت مهمتك تحمينى


تحكمنى لا


تضربنى مش من حقك


الوضع اصبح انيل واسخم


واضيف


واضل سبيل


انا مواطنة مصرية وانضحك على


انا محستش بالتغيير وهنزل يوم 27مايو
علشان صحابى اللى اتعذبوا


علشان الفاسد يتحاكم


علشان الثوره لسه مخلصتش


--------------------

Posted by Nadine Abu Shady at 1:01 PM 1 comments

Thursday, April 21, 2011

حوار من نصه

طفل عنده ست سنين
******
 ايوا يعنى اللى ماتوا ياحوا(راحو ) فين
ماما: راحوا الجنه يا حبيبى

ايوا يعنى الجنه دى فين

ماما: عند ربنا
طب واحنا لما نموت هنيوحلهم (هنروحلهم )
ماما:اه يا حبيبى
وانتى ايش عيفك(عرفك ) ان هما ف الجنه اومال هى الناى(النار) فين

ماما: ميدو معرفش انت زهقتنى بجد
خلاث خلاث انا عايف الناى(اى النار) فين

ماما: فين يا فالح

ف السما فوق مصر بالظبط

**

Posted by Nadine Abu Shady at 2:52 AM 1 comments

Monday, January 24, 2011

انسة ... انسة
انتى مسيحية ولا مسلمة
****************

كون البعيدة ( اللى هى انا )
مش محجبة ولا لابسا صليب ولا اسمى له ملامح بتعرض للسؤال دا كتير
دا بيحصل مع ناس كتير
بس الافيه هنا فى مواقف السؤال
اغرب تلات مواقف اتعرضت لها
.........................................
  1. طنط اللى ف المترو
ليل / مترو الدقى
واقفه بداخل احدى عربات السيدات واذا بسواق المترو متلهوج ويلوج الراكبين بالداخل
قربت منى ست وهى تتبعتر ف العربيه وابتسمت لى
رديت لها الابتسامه
شوفتى بيجرى ازاى
انا : مش فاهمه هو فى ايه هو داخل سباق مع مترو تانى
هى: لا ماكل حاجة بقت بسرعه كده الدنيا بقت غريبه

دخل المتر محطه الدقى فقربت من الباب انزل لقيتها نازله معايا
وقالتلى انا ممكن اقولك على حاجه بس محرجه منك اوى تفهمينى غلط
قلت لنفسى ( اه مانا ناقصه بقا تقليب انا زى المثقفين الجدد كده)
انا : لا اكيد حضرتك اتفضلى
هى : انا واحده نصبت على ف مبلغ وانا كاتباه عليه مش عارف ايه وبللوء بللوء بللوولوء
وفجأة سكتت وقالتلى
انتى مسيحيه ولا ومسلمة
اذ اتصدمت انا وانبعجت حواجبى
وساعتها بس لاحظت انها لابسا صليب
انا: وليه السؤال دا خلينا ف موضوعك
هى : لا بس بسأل عادى
انا : لا ميخسش حد السؤال دا خالص بس لازم اعرف بتسألى ليه
ابتسمتلى وقالت: لا شكلك مسيحيه زى مدام مش محجبه اصلى ف يوم كنت بسأل واحده كانت محجبه فى حاجه كده
ومرضتش تساعدنى وقالتلى لا مدام انتى مسيحيه مش هديكى حاجه ف انتى لو مسلمه لو سمحتى مش عايزا منك حاجه
انا ساعتها ضيعت ومشيت مذبهله
جدااااااااااااا
.............................................................

  1. بنت طنط بتاعت التوك ف المترو برضو
ليل/ مترو برضو بس محطه الزهراء
بنت كارفا على عشر سنين وهدومها متسرش عدو ولا حبييب
ابلة ... ابلة
ممكن اتكلم من موبيلك دقيقه
انا فى قرارة نفسى " هو مفيش حد بيتقلب فى مصر غيرى ولا ايه

انا : لا يا حبيبتى معييش رصيد
لقيتها بتعيط بجد
وقلبى اتقطع سامبوكسات
انا : طيب ايه حصل يا بنتى
ماما تاهت منى وهى بتبيع ف المترو وبدور عليها مش لاقياها
انا : رقمها كام يا حبيبتى
هى مفتكرتش غير تسع ارقام ومخها وقف وقالتلى انها هتدور على مامتها وانا قلتلها تروح احسن لو بتعرف وعرفت ان بيتهم ف المعصرة
وبصراحه شكلها كده معهاش تذكره
انا : طيب انتى اسمك ايه
هى : امانى
انا : امانى معاكى تذكرة طيب
هى : لا ليه
انا : طيب تعالى اجيبلك تذكرة
هى اداتنى ريأكشن ذكى رستم وقالتلى مش عايزا منك حاجه ومشت وسابتنى
انا فى حيرة من امرى
مالك يا بت فى ايه
طب استنى
مش بكلمك انا
يا امانى
استنى يا زفته
زعلتى ليه
امانى: مش عايزا منك فلوس انا ولا تذكرة ولا حاجه انا طلبت منك تكلمى ماما ومعرفتش الرقم خلاص
انتهينا انا هعرف اعدى من غير تذكرة عارفا الناس اللى هناك
حسستنى انها بتقطع علاقتها بيا
قولتلها : اوكى اركبى معايا ببقا انتى نفس الخط
وف المترو سألتنى سألتنى سؤل المليون جنيه
انتى مسيحيه؟
قولتلها : ليه يا امانى جايبالى عريس مسيحى
امتعضت من قلشى وقالتلى لا جاوبينى
قولتلها ليه تفرق ف ايه يا امانى
قالتلى اصل المسيحيين وحششششششششين
وقاالتها بحرقه
حسيت انى حد قتلها امها مثلا
ليه يا بنتى ربنا يهديكى
امانى: دا فى ظابط من يومين ضربهم كلهم بالنار ف القطر احسن يستاهلوا
انا : انتى عبيطه يا بت يستهلوا ليه حرام عليكى محدش يستاهل كده لازم يتحاكم
امانى : الجرنال قال كده وقال كمان انهم قتلوا واحد وزير ف الانعاش
انا : يخربييت مخك يا بت جبتى الكلام د منين وبعدين ما الجرنال بيقول عليكو شحاتين وحراميه هو انتو حراميه
قالتلى لا عمرى ما سرقت من حد
قولتلها هو يا بت مش الظابط بياخد فلوس منك ومن امك اتاوة
قالتلى اه دول ولاد وسخه
انا: يبقى ازاى اللى الظابط بيقول عليه صح واللى الجرنال بكتبه صح

ماما قالتلك كده قبل كده ان المسيحيين وحشيين
قالتلى لا عمرها ماجابت سيرتهم
قولتلها طب ليه تفكرى كده ماهما برضو زيك بيلعبوا وبيروحوا مدرسه وبيساعدوا اهلين وبيتجوزا وبيروحوا وبيجوا فرقتيهم ليه لوحدهم وحكمتى من غير ما تعرفى حاجه
وبعدين اللى فجر كنيسه واللى مسك مسدس قتلوا اطفال زيك وف سنك
ساعتها البت حست بالذنب من كلامها على اطفال زيها
قالتلى انا اسفه مكنتش اعرف مانا معرفهمش
قولتها يا حبيبتى متحكميش على حد من غير ما تعرفيه وبعدين الدين ماله ومال الكلام الفارغ دا
النا عايزا تتخانق وخلاص
وساعتها وصلنا
قالتلى خلاص هروح النهارده للعيال اللى ف الاشرع اللى ورانا واجرب اللعب معاهم
انا : علشان كده مرضتيش تاخدى منى فلوس التذكرة؟؟؟
.............................................................

اضايقت جدااااا
الناس بتربى عيالها اواى وبتعامل بعض ازاى
مال الدين ومال العلاقه الانسانيه
الغم علينا واحد والقمع واحد
والهم واحد
والفقر واحد
والعته واحد

فى ايه؟

للحديث بقيه


Posted by Nadine Abu Shady at 2:31 AM 1 comments
Older Posts
Subscribe to: Posts (Atom)